தமிழகம், புதுச்சேரி உட்பட ஐந்து மாநிலங்களில் நடைபெறும் சட்டசபை தேர்தலுக்கு தடை விதிக்கக்கோரி உச்ச நீதிமன்றத்தில் வழக்கு தொடரப்பட்டது. இம்மனுவை உச்சநீதிமன்றம் தள்ளுபடி செய்துள்ளது.
தமிழகம், புதுச்சேரி, கேரளா, அசாம், மேற்கு வங்கம் ஆகிய மாநிலங்களில் சட்டசபை தேர்தல் நடக்கிறது. இதில், தமிழகம், புதுவைக்கு ஒரே கட்டமாக வரும் 6ம் தேதி தேர்தல் நடைபெறவுள்ளது. இதற்கான பணிகளை தேர்தல் ஆணையம் ஏற்கனவே தொடங்கிவிட்டது. அதேபோல், அரசியல் கட்சிகளும் தொகுதிப் பங்கீடு, தொகுதிகளை அடையாளம் காணும் பணியில் இறங்கியுள்ளன.
இச்சூழலில், தமிழகம் உள்ளிட்ட 5 மாநில சட்டசபை தேர்தலை ரத்து செய்யக்கோரி, உச்ச நீதிமன்றத்தில் பொதுநலன் மனு தாக்கல் செய்யப்பட்டது. உச்சநீதிமன்ற வழக்கறிஞர் எம்.எல். சர்மா என்பவர், கடந்த 6-ம் தேதி உச்சநீதிமன்றத்தில் தாக்கல் செய்த பொதுநல மனுவில், தமிழகம் உட்பட 5 மாநிலங்களில் சட்டசபை பதவிக்காலம் நிறைவடைவதற்கு முன்பே தேர்தல் அறிவிக்கப்பட்டுள்ளதாக தெரிவிக்கப்பட்டுள்ளது.
எனவே, சட்டசபை பதவிக்காலம் முடிந்த பிறகு வாக்குப்பதிவை தேர்தல் ஆணையம் நடத்த வேண்டும். அத்துடன், பிரதமர் நாடு முழுவதற்கும் பொதுவானவர்; அவர் தேர்தல் பிரசாரத்தில் ஈடுபடுவதற்கும் தடை விதிக்க வேண்டும் என, தனது மனுவில் சர்மா கேட்டுக் கொண்டிருந்தார்.
இந்த மனு மீதான விசாரணை, உச்சநீதிமன்றத்தில் இன்று விசாரணைக்கு வந்தது. தலைமை நீதிபதி எஸ்.ஏ. போப்டே தலைமையிலான அமர்வு, இந்த மனுவை விசாரித்து, தமிழகம் உள்ளிட்ட 5 மாநில சட்டசபை தேர்தலுக்கு தடை விதிக்கமுடியாது எனக்கூறி பொதுநல மனுவை தள்ளுபடி செய்து உத்தரவிட்டது.
எனவே, திட்டமிட்டபடி சட்டசபைத் தேர்தல் நடத்துவதில் ஆணையத்திற்கு எந்த தடையும் இல்லை என்பது குறிப்பிடத்தக்கது.
